Autónomos e pemes solicitan medidas ao Concello fronte ao parón na actividade provocado polo COVID 19.
As xuntas directivas do Centro Comercial Aberto e da Comunidade de Propietarios do Polígono solicitaron ao Concello de Carballo a adopción dunha serie de medidas fiscais dentro do seu ámbito competencial que axuden ao tecido empresarial local a superar estes momentos de incerteza. Algunha destas demandas xa foron atendidas.
As medidas adoptadas para frear a pandemia vinculada ao COVID 19, supuxeron un parón sen precedentes na económica do país. Este parón está a afectar á normal actividade de empresas e autónomos o que conleva unha grave diminución dos seus ingresos véndose obrigados, en non poucos casos, a acollerse aos ERTEs ou á suspensión temporal da actividade. O comercio e as empresas situadas en Carballo non están a ser alleas a esta situación.
Desde Gobérnoo de España e a Xunta de Galicia empezaron a tomar as primeiras medidas para apoiar ao sector produtivo nestes meses de inactividade. Desde as xuntas directivas do Centro Comercial Aberto e da Comunidade de Propietarios do Polígono solicitamos tamén ao Concello de Carballo a adopción dunha serie de medidas fiscais dentro do seu ámbito competencial que axuden ao tecido empresarial local a superar estes momentos de incerteza.
O pasado 26 de marzo solicitabamos á Alcaldía a adopción das seguintes medidas:
- Custo cero de taxas municipais a pemes e autónomos mentres se prolongue o estado de alarma.
- Ampliar e atrasar o prazo no pago do IBI (Imposto de Bens Inmobles de Natureza Urbana), así como estudar a redución/bonificación deste imposto.
- Ampliar e atrasar o prazo no pago do IVTM (Imposto sobre vehículos de tracción mecánica).
- Garantir a continuidade dos contratos públicos municipais.
Algunhas destas medidas foron incluídas no paquete de medidas fiscais que anunciou o goberno municipal (Achegamos arquivo).
Hoxe, 13 de abril ambas as entidades presentaron no rexistro municipal un segundo paquete de medidas máis ambiciosas e que xa foron postas en marcha por municipios da contorna. (Achegamos solicitude). Situacións extraordinarias requiren accións extraordinarias. Nestes momentos o comercio e as empresas de Carballo son conscientes que a prioridade é dar resposta á emerxencia sanitaria, pero consideramos imprescindible tomar medidas de apoio ao tecido produtivo para garantir os empregos e a viabilidade da actividade económica local.
