Segunda promoción del Programa Transformación Digital Pymes.
Esta fin de semana celebráronse as dúas últimas sesións presenciais do programa, orientado a impulsar a transformación dixital das pemes. No peche acompañou aos participantes Venancio Salcines, reitor do Centro de Estudos Superiores Universitarios de Galicia (CESUGA).
O pasado mes de abril, un grupo de seis responsables de empresas con máis de dez empregados da Costa da Morte iniciou a súa participación na II Edición do Programa Transformación Dixital PEMES, unha iniciativa financiada con fondos Next Generation cuxo obxectivo é impulsar a dixitalización do tecido empresarial.
Os contidos e formadores do programa foron deseñados pola Escola de Organización Industrial (EOI) e o Centro de Estudos Superiores Universitarios de Galicia (CESUGA), estruturados en catro módulos formativos que abordaron como a dixitalización afecta á relación con clientes e provedores, aos procesos internos e á xestión dos recursos humanos. En total, o programa ofreceu 150 horas de formación e 10 de consultoría personalizada, impartidas maioritariamente en formato en liña, mentres que as sesións presenciais desenvolvéronse no Centro de Promoción Económica do Polígono de Carballo.
Este sábado tivo lugar a última sesión presencial, na que participou Venancio Salcines, reitor de CESUGA, quen felicitou ás persoas participantes pola súa implicación e animounas a implementar a transformación dixital nas súas empresas. “A dixitalización xa non é unha cuestión de competitividade, senón de supervivencia”, subliñou Salcines.
Dada a boa acollida desta formación, desde o Polígono de Carballo xa se traballa no lanzamento dun novo programa formativo sobre dixitalización, orientado a empresas de menos de dez empregados, tamén en colaboración con CESUGA.
O Polígono de Carballo, un referente en xestión empresarial.
O pasado 1 de outubro, os propietarios do Polígono de Carballo deron o paso definitivo para constituír a primeira Entidade de Conservación, Xestión e Modernización (ECOXEM) de Galicia, unha figura creada pola Lei 3/2022 de Áreas Empresariais de Galicia para profesionalizar e modernizar a xestión dos parques industriais.
Este carácter pioneiro do Polígono de Carballo será posto en valor o 3 de novembro en Madrid, nunha xornada técnica organizada pola Confederación Española de Áreas Empresariais (CEDAES) e a Federación Española de Municipios e Provincias (FEMP), na que o xerente do polígono, Pablo Rodríguez, presentará a experiencia de Carballo, o proceso de constitución da ECOXEM e as principais vantaxes e características deste novo modelo de xestión.
