Luz verde á constitución da ECOXEM do Polígono de Carballo.

A creación da primeira Entidade de Conservación, Xestión e Modernización (ECOXEM) da comunidade autónoma é o principal reto que a Xunta Directiva da Comunidade de Propietarios do Polígono se marcou para 2025. Para iso, convocouse a Xunta Xeral Extraordinaria onte ás 20:00 horas no Centro Social de Bértoa, co obxectivo de aprobar a proposta de Estatutos. Este é o primeiro paso establecido pola Lei 3/2020 de áreas empresariais de Galicia para a constitución definitiva deste tipo de organizacións.

A relevancia do asunto reflectiuse na alta asistencia de propietarios á reunión, entre eles o concelleiro de Obras, Luis Lamas, en representación do Concello, e a directora xeral de Estratexia Industrial e Solo Empresarial da Xunta de Galicia, Margarita Ardao, na súa calidade de presidenta de Xestur.

Unha vez iniciada a sesión, desde a xerencia explicouse en detalle o novo marco normativo que regula a administración dos polígonos e áreas empresariais segundo a Lei de áreas empresariais de Galicia. Destacouse como esta normativa cobre o baleiro legal existente mediante a creación destas entidades. Ata a data, os polígonos galegos recorrían a figuras non deseñadas especificamente para a súa xestión, como as entidades urbanísticas de conservación, as asociacións de empresarios e, en casos como o de Carballo, as comunidades de propietarios. Cada unha destas estruturas presenta limitacións que dificultan a administración cotiá dun parque empresarial.

No caso das comunidades de propietarios, o funcionamento da nova entidade será similar. A Xunta Xeral de Propietarios seguirá sendo o máximo órgano de goberno e elixirá unha Xunta Directiva por un período de catro anos, composta por un presidente, un vicepresidente, un tesoureiro e vogais. Como novidade, incorporarase un representante do Concello con voz, pero sen voto. A diferenza das comunidades de propietarios, a nova entidade contará con personalidade xurídica plena e carácter de entidade de dereito público. Isto permitirá, entre outras vantaxes, acceder directamente a novas fontes de financiamento público para mellorar a infraestrutura do polígono e poñer en marcha novos servizos en beneficio de todas as empresas e usuarios do parque empresarial.

Tras a explicación do novo marco legal e das vantaxes destas entidades, someteuse a votación a proposta de Estatutos, que foi aprobada por unanimidade. Os propietarios asistentes e representados sumaban o 62% da superficie total do parque empresarial, superando amplamente o 50% esixido pola lei para a súa aprobación efectiva.

Este respaldo marca o primeiro paso para a constitución oficial da entidade. A proposta de Estatutos debe ser ratificada polo pleno da corporación municipal. Unha vez aprobada, o acordo publicarase no BOP e abrirase un prazo de alegacións dun mes. Posteriormente, procederase á formalización mediante escritura pública ou documento protocolizado notarialmente nunha nova Xunta Xeral de Propietarios. Finalmente, remitirase ao Concello unha copia da escritura para a súa autorización definitiva.

Desde a Comunidade de Propietarios do Polígono confían en que a nova ECOXEM do Polígono de Carballo quede constituída ao longo do ano. Ademais, consideran que esta sería unha excelente forma de celebrar o 35.º aniversario do parque empresarial, inaugurado o 7 de xullo de 1990.